Qobustan Azərbaycan tarixini özündə əks etdirən qədim yaşayış məskəndir. YUNESKO-nun Dünya Mədəni İrs siyahısına salınmış Qobustan qoruğunda yerli insanların həyatı və məişəti qayaüstü təsvirlər vasitəsilə canlanır. Qobustanda 6000-dən çox petroqliflər və ya qayaüstü təsvirlər mövcuddur. Onlardan ən qədimi 40 000 il əvvələ aiddir.
Böyükdaş, Kiçikdaş və Cingirdağ dağlarından ibarət olan qoruq Bakıdan təqribən 60 kilometr cənubda yerləşir. Burada Yuxarı Paleolit dövründən orta əsrlərə qədər insanların məskunlaşdığı mağaralar, yaşayış məntəqələri və dəfn yerlərinə rast gəlmək olar. Bundan başqa, bu ərazi dünyanın yeddi təbii möcüzəsindən biri hesab olunan palçıq vulkanları ilə də zəngindir.